Cogordos - Xuntanza de micólogos

INGREDIENTES PARA A MASA:
600 grs. de fariña.
1 noz de fermento.
Un chisco de sal.
½ vaso cumprido de leite.
1 chorriño de aceite de oliva (opcional).
Un pouco de auga quente.

INGREDIENTES PARA A PIZZA:
Tomate natural esmagado.
Ourego moído.
Aceite, allos (2 dentes), prixel, sal e pementa.
150 grs. de touciño entrefebrado.
400 / 500 grs. de cogomelos.
Mozzarella (queixo de fundir).
Coprinus comatus.

PREPARACIÓN DA MASA:
Nunha cunca, ponse a fariña, en forma de volcán, facendo unha focha no centro. Bótase o fermento disolto en ½ vaso de auga quente. Nun pouco máis de ½ vaso de leite, bótase o sal. Engádense o leite co sal e o chorriño de aceite (opcional). Amasar ben e deixar que fermente, tapando o recipiente cun pano, ata que alcance o dobre do volume inicial. Amásase de novo e esténdese para elabora-la pizza.

PREPARACIÓN DA PIZZA:
Ponse o tomate a macerar co ourego en po ( mellor unhas 3 horas antes). Refogar nunha tixola, co aceite, os allos e mailo touciño entrefebrado. Unha vez que o allo estea á metade da cocción, engádense os cogomelos, limpos e picados e tápase a tixola para que solten o seu zume. Engádese o sal, a pementa e o prixel, ó gusto. Deixar a lume lento, ata que estea cociñado. Unha vez estendida a masa e colocada na bandexa de forno, engádese o tomate macerado, estendéndoo ben, enriba da masa.
Póñense por riba os cogomelos cociñados, estendéndoos por toda a masa.
Cóbrese todo con mozzarella. Métese no forno, previamente quentado a uns 220 graos, durante 10 ou 15 minutos.